مەملەكەت باسشىسى باس پروكۋرور بەرىك اسىلوۆتى قابىلدادى. پرەزيدەنتكە ەلىمىزدەگى زاڭدىلىق پەن قۇقىقتىق ءتارتىپتىڭ جاي-كۇيى, سونداي-اق قاداعالاۋشى ورگاننىڭ قىزمەتىندەگى باسىم باعىتتار جونىندە مالىمەت بەرىلدى, دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.
بەرىك اسىلوۆ زاڭسىز يەمدەنىلگەن اكتيۆتەردى قايتارۋ ءۇشىن قابىلدانىپ جاتقان شارالار جانە وسى ماقساتتا جاڭادان قۇرىلعان كوميتەتتىڭ قىزمەتى تۋرالى باياندادى. باس پروكۋروردىڭ ايتۋىنشا, كوميتەت شەتەلگە شىعارىلعان اكتيۆتەردى ىزدەۋ, زاڭسىز سحەمالاردى اشكەرەلەۋ ءۇشىن جاساندى ينتەللەكتىنى پايدالانۋ ارقىلى IT تەحنولوگيالاردى قولدانادى.
مەملەكەت باسشىسىنا ماڭىزدى ينۆەستيتسيالىق جوبالاردى قۇقىقتىق تۇرعىدان قولداۋ جۇمىستارى جونىندە اقپارات بەرىلدى. قۇرامىنا سىرتقى ىستەر مينيسترلىگى, «قازاق-ينۆەست» ۇك» اق, «اتامەكەن» ۇكپ وكىلدەرى جانە بيزنەس-ومبۋدسمەن كىرەتىن ارناۋلى ۆەدومستۆوارالىق كوميسسيا ينۆەستيتسيالىق احۋالدى جاقسارتۋعا باعىتتالعان العاشقى شارالاردى ازىرلەدى. پروكۋرورلار 900-دەن استام ينۆەستيتسيالىق جوبانى باقىلاۋعا الدى. قازىردىڭ وزىندە 41 ينۆەستوردىڭ تۇيتكىلدى ماسەلەلەرى شەشىمىن تاپتى.
پرەزيدەنتكە ينۆەستيتسيانىڭ قاۋىپسىزدىگىنە كەپىلدى كۇشەيتۋ ءۇشىن ينۆەستيتسيالىق جوبانى جۇزەگە اسىرۋدىڭ بۇكىل پروتسەسىن ناقتى ۋاقىت رەجيمىندە باقىلاۋدا ۇستاۋعا مۇمكىندىك بەرەتىن تسيفرلىق شەشىمدەر ەنگىزۋ, سونداي-اق مەملەكەتتىك ورگانداردىڭ بيزنەسكە قاتىستى نەگىزگى شەشىمدەرىن پروكۋرورمەن كەلىسۋ ۇسىنىلدى.
سونىمەن قاتار قاسىم-جومارت توقاەۆقا ءۇش بۋىندى مودەل اياسىندا كاسىپكەرلەردى قىلمىستىق قۋدالاۋ 3 ەسە قىسقارعانى (614-تەن 204-كە دەيىن) جونىندە مالىمەت بەرىلدى. جالپى, ەلىمىز بويىنشا 1041 تۇلعانىڭ نەگىزسىز قىلمىستىق قۋدالاۋعا تارتىلۋىنا جول بەرىلگەن جوق. كونستيتۋتسيالىق قۇقىق بۇزۋشىلىقتار سانى 29 پايىزعا قىسقاردى (310-نان 222-گە دەيىن).
بۇدان بولەك, پرەزيدەنتكە ازاپتاۋعا قارسى ءىس-قيمىل شارالارى جونىندە باياندالدى. مۇنداي ارەكەتتەردىڭ الدىن الۋ ءۇشىن 54 تۇزەتۋ مەكەمەسىندە 29 مىڭ بەينەكامەرا ورناتىلعان, سايكەسىنشە ازاپتاۋ فاكتىلەرىنە شاعىمدانۋ دا 94-تەن 17-گە دەيىن ازايعان.
سونداي-اق باس پروكۋرور قوعامدا رەزونانس تۋدىرعان قىلمىستاردىڭ تەرگەلۋ بارىسى جونىندە ەسەپ بەردى. اتالعان ماسەلەلەرمەن قاتار, حالىقارالىق ىنتىماقتاستىق باعىتىندا اتقارىلعان جۇمىستاردىڭ ناتيجەسى تانىستىرىلدى. اتاپ ايتقاندا, بيىل شەتەلدەن اۋىر جانە اسا اۋىر قىلمىس جاسادى دەپ ايىپ تاعىلعان 40 ادام ەكستراديتسيالاندى. جالپى قازاقستان قىلمىستىق-قۇقىقتىق سالا بويىنشا الىس شەتەلدىڭ 34 مەملەكەتىمەن 74 شارتقا قول قويدى.
كەزدەسۋ سوڭىندا قاسىم-جومارت توقاەۆ ەلىمىزدىڭ تىنىس-تىرشىلىگىنە قاتىستى بارلىق سالادا زاڭنىڭ ساقتالۋىن قامتاماسىز ەتۋ ءىسىن كۇشەيتۋ قاجەت ەكەنىنە نازار اۋداردى.